Fréttir

Tími endurskinsmerkja genginn í garð

22. okt. 2018

Nú er veturinn á næsta leiti og tímabært að huga að endurskinsmerkjunum. Í myrkri sjást gangandi vegfarendur illa þrátt fyrir götulýsingu og ökuljós bifreiða. Þetta á sérstaklega við þegar um dökkan klæðnað er að ræða en þó má í öllum tilfellum fullyrða að endurskinsmerki séu nauðsynleg. Endurskinsmerkin þarf að staðsetja þannig að þau séu sýnileg og best er að hafa þau fremst á ermum, hangandi meðfram hliðum, á skóm eða neðarlega á buxnaskálmum. Þá virka endurskinsmerkin eins og blikkljós þegar ljós skín á þau. Því fyrr og betur sem ökumenn greina óvarða vegfarendur, hvort sem þeir eru gangandi, hlaupandi eða hjólandi, þeim mun meira er öryggi þeirra í umferðinni. Það er staðreynd að ökumenn sjá vegfarendur með endurskinsmerki a.m.k. fimm sinnum fyrr og því getur notkun endurskinsmerka skipt sköpum.

 

Breytt dagsetning samræmdu prófanna í 9. bekk í mars

19. okt. 2018

Samræmd könnunarpróf í 9. bekk skólaárið 2018-2019

Menntamálastofnun hefur borist tilkynning frá mennta- og menningarmálaráðuneytinu um breytingu á dagsetningum samræmdra könnunarprófa í 9. bekk, sem haldin verða í mars 2019. Ráðuneytið hefur ákveðið að færa dagsetningar könnunarprófanna fram um einn dag. Ástæða breytinganna er sú að Íslandsmót iðn- og verkgreina skarast á við fyrirhugað könnunarpróf í ensku þann 14. mars. Í tilkynningunni er nefnt að bæði Íslandsmótið og samræmdu könnunarprófin séu afar mikilvæg fyrir skólasamfélagið og þau geti ekki farið fram sama dag.

Vikudagur

Dagsetning

Bekkur

Námsgrein

Mánudagur

11. mars 2019

9. bekkur

íslenska

Þriðjudagur

12. mars 2019

9. bekkur

stærðfræði

Miðvikudagur

13. mars 2019

9. bekkur

enska

Íþróttahátíð Grunnskólanna haust 2018

Tálknafirði  fim. 18. okt.  8.-10. bekkur

Dagskrá

8:30 mæting í hús og allir gera sig klára

8:45 upphitun

9:10 skipt í lið

9:20 körfubolti

10:00 bandy

10:35 fótbolti

11:10 brennó

11:45 boðsund

12:30 pizza á Hópinu

·         Allir nema þau lið sem eru að keppa eru uppi í áhorfendastúku

·         Það er engin pása eða kaffitími, nærist milli leikja

·         Allir út í sundlaug eftir brennó, en aðeins þeir sem keppa í boðsundi fara í sundlaugina hinir fara í pottana eða vaðlaugina, þegar boðsundinu er lokið eru allir velkomnir í sundlaugina.

Samstarf Arctic Fish og Tálknafjarðarskóla

11. okt 2018

Arctic Fish í botni Tálknafjarðar hefur til umráða hágæða rannsóknarstofu búna fullkomnustu tækjum og eru tveir hámenntaðir líffræðingar sem annast rannsóknir fyrir stöðina. Nemendur Tálknafjarðarskóla munu fá að kynnast starfseminni og kryfja fisk og gera ýmsar athuganir og tilraunir, rannsaka bakteríur í rafeindasmásjám o. m.fl. Arctic Fish mun sjá um asktur á milli skóla og stöðvar. Tálknafjarðarskóli fagnar þessu samstarfi og því tækifæri sem nemendur fá til að kynnast vísindastarfi.

Bleiki dagurinn 2018

11. okt 2018

Föstudagurinn 12. október 2018 er Bleiki dagurinn. Bleiki dagurinn hefur notið sívaxandi vinsælda undanfarin ár í bleika októbermánuðinum. Þennan dag hvetjum við landsmenn til að sýna samstöðu, klæðast bleiku og hafa bleikt í fyrirrúmi. Krabbameinsfélagið óskar eftir stuðningi almennings og fyrirtækja sem er gundvöllur þess að Krabbameinsfélagið geti starfað. 

Frí námsgögn og ávextir í skólanum

2. okt. 2018

Tálknafjarðarhreppur býður nemendum frí námsgögn og sömuleiðis fría ávexti í skólanum. Nemendur þurfa því ekki að koma með nesti né kaupa námsgögn. Nemendur eru mjög meðvitaðir um hollustu og hreyfingu og íþróttaáhugi óvenjulega mikill og sem dæmi þá völdu 90% nemenda í 7.-10. bekk, skólahreysti í vali.

Einnig má geta þess að engin unnin mætvæli eru notuð í skólanum og allt hráefni til matar stenst ýtrustu kröfur um gæði og hreinleika.

Heimsókn skólahjúkrunarfræðings 3. október

2. okt. 2018

Hjúkrunarfræðingur skólans verður með skólaskoðanir þ.e.a.s skimanir fyrir hæð, þyngd og sjón ásamt viðtali um lífstíl og líðan hjá 1. bekk, 4. bekk, 7. bekk og 9. bekk miðvikudaginn 3. október.

Forvarnardagurinn 3. október

29. sept. 2018

Forvarnardagurinn verður haldinn miðvikudaginn 3. október nk. Með deginum er verið að koma á framfæri þremur heillaráðum sem rannsóknir hafa sýnt að geta stuðlað að því að ungmenni verða síður áfengi og fíkniefnum að bráð. Heillaráðin þrjú eru: Samvera með fjölskyldu og vinum, þátttaka í skipulögðu íþrótta og tómstundastarfi og að fresta því að hefja drykkju áfengis. Þessir þrír þættir hafa sýnt sig vera verndandi þegar kemur að áfengis- og vímuefnaneyslu og því vert að huga að því að styrkja þá með öllum ráðum.

Íþróttaskóli barnanna

 25. sept. 2018

1.-2. bekkur í íþróttahúsinu

Tími

Mánudaga og miðvikudaga kl 13.15-14.00

Þri-, fim- og föstudaga kl 14.00-14.45

Hvað, hvenær:

Mán-, miðviku- og föstudaga er grunnþjálfun og sund. Þjálfari Maya (Marion Gisela)

Þriðju- og fimmtudaga er bolti. Þjálfari Kristján Arason

Önnin kostar 16 þúsund kr.

Börn sem alast upp við hollustu, hreyfingu, reglu og góðan svefn eru mun líklegri til að vegna vel í skóla og almennt í lífinu og eru mun ólíklegri til að ánetjast fíkniefnum. Íþróttir eru góð forvörn.

,,Lof mér að falla" á vegum félagsmiðstöðva

20. sept 2018

Félagsmiðstöðvar í samvinnu við foreldrafélögin í skólunum á svæðinu standa að sýningu myndarinnar ,,Lof mér að falla”  fimmtudaginn 20. september.

Albína býður nemendum í 9.-10. bekk á sýninguna og Allt í járnum gerir þeim kleift að komast yfir fjall. Farið verður frá Tíglinum kl 19:00 og komið til baka um 23.00

Svanhvít Sjöfn Skjaldardóttir kemur og stýrir umræðum. ,,Lof mér að falla”  er mynd sem byggð er á sannsögulegum atburðum um 15 ára stúlku sem ánetjast fíkniefnum og þykir myndin hafa gott forvarnargildi. Myndin hefur fengið mikla umfjöllun. Nokkur atriði myndarinnar eru erfið en myndin er bönnuð innan 14. Tveir starfsmenn skólans fara með.

Sýningin "Björt í sumarhúsi"

13. sept 2018

Sýningin Björt í sumarhúsi er söngleikur fyrir börn eftir Elínu Gunnlaugsdóttur við texta Þórarins Eldjárns sem byggir á ljóðum úr bókinni ,,Gælur, fælur og þvælur”. Sýningin er hugsuð fyrir yngsta stigið, elstu leikskólabörnin eru velkomin en að sjálfsögðu eru textar Þórarinns, tónlist, söngur og píanóleikur fyrir allan aldur þó sagan sé fyrir yngri áhorfendur. Sýningin verður í Tálknafjarðarskóla þriðjudaginn 18. sept kl. 10.00 eftir að allir eru komnir úr sundi eftir skólahlaupið

Skógrækt með Brynjólfi Gíslasyni

13. sept 2018

Farið verður í að gróðursetja plöntur með Brynjólfi Gíslasyni mánudaginn 17. sept. með þáttöku nemenda. Brynjólfur hefur þá tillögu að nefna plönturnar og að krakkarnir veldu nöfn á þær og notuðu nöfn dverga úr dvergatali Völuspár. Nafngift gæti aukið líkur á að staðsetning þeirra festist betur í minni. Meðal annars verða gróðursett ávaxtatré

 

Valgreinar

13. sept 2018

Valgreinar fara í gang á þriðjudaginn 18. sept. Skólahreysti er vinsælt val og verður í tveimur hollum á fimmtudögum.

Mánudagar: 1) Myndmennt  2) Borðspil 3) skák 4) Origami

Þriðjudagar: 1) Joga 2) vísindi og tækni, enskar bækur og myndir

Fimmtudagar; 1) Skólahreysti 9.-10.bekkur  byrjar kl. 12.10-13.10 og .7. -8. bekkur kl 13.10-14.10 
                          2) Yndislestur 3) bókmenntir

Eftir hádegi á miðvikudögum er smiðja. * Hugsanlega þarf smá lagfæringu á uppröðun

Mentor

13. sept 2018

Nú notum við Mentor. Mentor er heildstætt upplýsinga– og námskerfi fyrir nemendur, foreldra og skólann.  Þegar nemandi hefur nám í grunnskóla fá foreldrar hans aðgang að Mentor. Skólinn hefur tök á að senda reglulega upplýsingar um nám barnsins og skólastarfið til foreldra og foreldrar geta einnig sent upplýsingar til skólans. Með Mentor getur skólinn sett fram markmið fyrir hverja námsgrein á skýran og einfaldan hátt og þannig geta foreldrar alltaf haft aðgang að þeim markmiðum sem barn þeirra vinnur að og því sem við tekur.

Norræna skólahlaupið

13. sept 2018

Norræna skólahlaupið heitir nú Ólympíuhlaup ÍSÍ. Með Ólympíuhlaupi ÍSÍ er eins og áður leitast við að hvetja nemendur skólanna til þess að hreyfa sig reglulega og stuðla þannig að betri heilsu og vellíðan. Nemendur geta nú sem áður valið á milli þriggja vegalengda í hlaupinu, þ.e. 2,5 km, 5 km eða 10 km. Að hlaupinu loknu fær hver þátttakandi og hver skóli viðurkenningarskjal þar sem greint er frá árangri. Hlaupið verður nú á þriðjudaginn 18. sept kl 8.30 og síðan endað í sundi.

Brúðuleikhús fyrir Yngstakjarna í Skjaldborg Patró

6. sept 2018

Sýningin “Sögustund” á vegum Þjóðleikhússins og Brúðuheima verður í Skjaldborg kl. 10.00- 10.45. Krakkarnir fara með umsjónarkennara og er rútuferð fram og til baka.

Saga heimabyggðarinnar

6. sept 2018

Dagný frá Tungu sem rekur veitingastaðinn í Dunhaga bauð öllum skólanum í myndasýningu og sögustundí í síðustu viku. Sagði hún frá sögu og byggðaþróun Tálknafjarðar, sögu Hvalstöðvarinnar á Suðureyri og uppbyggingu “Þorpsins” og sýndi hún meðal annars myndir af fyrsta skólahúsinu og sundkennslunni hér áður fyrr. Frábært framtak og vel lukkað og Dagný hélt athygli allra barnanna allan tímann. Skólinn þakkar kærlega fyrir þetta góða framtak.

Matseðill vikunnar

6. sept 2018

Matseðill vikunnar birtist nú vikulega á heimasíðunni og má finna undir hnappnum “Starfið” og “Matseðill”. Matseðillinn er vandaður og fjölbreyttur og næringargildið mikið.

Lengd viðvera

6. sept 2018

Þar sem við fylgjum viðmiðunarstundaskrá þá er skólatími mislangur eftir aldri. 1.-2. lýkur skóla kl. 13.05 og til að koma á móts við foreldra þá bjóðum við upp á lengda viðveru til kl. 14.00 og til viðbótar er íþróttaskóli þrisvar í viku frá 14.15 -15.00

Hreyfimánuður - göngum eða hjólum í skólann

5. sept 2018

Septembermánuður er hreyfimánuður í Tálknafjarðarskóla. Göngum í skólann 2018 var hleypt af stað í tólfta sinn í dag miðvikudaginn 5. sept. Verkefnið var formlega sett í Ártúnsskóla í Árbæ dag og Lárus Blöndal forseti ÍSÍ stjórnaði dagskrá. Nánar um átakið  inn á gongumiskolann.is 

Merkt er við í skólanum hverjir ganga, hjóla o.fv. Allir með!

Haustþing - Starfsdagur 7. sept

1.sept 2018

Föstudaginn 7. september verður starfsdagur í Tálknafjarðarskóla. Haustþing kennara verður haldið þennan dag á Suðureyri við Súgandafjörð. Meðal annars verða formaður og varaformaður FG Þorgerður Diðriksdóttir og Hjördís Albertsdóttir á staðnum. Fyrirlestrar verð um áhugaverð málefni.

Skólabúðir

  1. sept 2018

7. bekkur fór í skólabúðir að Reykjum í Hrútafirði. Umsjónarkennarinn Helga Birna Berhelsen fór með bekknum og var ferðin einkar ánægjuleg og skemmtileg.

Fleiri skólar voru mættir og þar á meðal krakkar frá Ísafirði, Bolungarvík, Suðureyri og Vopnafirði. Þetta var fyrsta skólabúðarvika vetrarins.

Athugasemdir Menntamálastofnunar

  1. sept. 2018

Menntamálastofnun gerði úttekt í fyrra sem kallast; “Ytra mat skóla”. Samkvæmt því þurfti að gera starfsáætlun sem sem og nokkrar aðrar áætlanir sem þegar hefur verið gerð og finna má hér á heimasíðunni undir hnappnum “Áætlanir”. Einnig var farið fram á “Námsskrá” en hennar er að vænta innan skamms. Sömuleiðis skorti á uppfærslur á heimasíðu en með þessari nýju heimasíðu verðu bót á og um leið betra upplýsingaflæði til foreldra.Síðan. Einnig þarf að bæta námsárangur og verður unnið að því.

Skólastarfið hafið

1. sept 2018

Skólastarf Tálknafjarðarskóla hefur farið vel af stað. Allir kennarar skólans eru reynslumiklir réttindakennarar með farsælan feril. 42 nemendur eru í Grunnskólanum í fjórum kjörnum og 10 nemendur eru í Leikskólanum í tveimur kjörnum. 32 nemendur stunda nám í Tónlistarskólanum. Sú breytng verður á starfinu að unnið verður í lotum í aðalkennslustund. 17 lotur eru fyrir jól og 19 eftir jól. Þetta þýðir að lotur eða námstarnir verða í eina til tvær vikur í senn í ákveðnu fagi. Byrjað var á náttúrufræði og er náttúrufræði kennd í öllum kjörnum þvert á aldur en ólík þyngd efnis eftir aldri. Mikli áhersla verður lögð á smiðjurnar sem eru þrisvar í viku eftir hádegi. Elstu hóparnir eru byrjaðir á steinhöggi og að tálga í tré.