Nánast allt starfsfólk Tálknafjarðarskóla sótti haustþing KSV í gær, föstudaginn 6. september. Mikil ánægja var með þátttöku á þinginu en um 60 manns sóttu þingið af öllu Vestfjarðasvæðinu. Innlegg þingsins munu nýtast sem innspýting í starfið okkar nú á haustmánuðum og þóttu öllum þau virkilega gagnleg.

Tveir fyrirlestarar voru fyrir hádegi og gátu starfsmenn valið sér efni við hæfi. Ásta Þórisdóttir listgreinakennari frá Grunnskólanum á Hólmavík var með skemmtilegan fyrirlestur og listasmiðju sem þótti sérlega skemmtileg. Einnig var Oddný Sturludóttir með þrusugóðan fyrirlestur um lærdómssamfélagið sem hentaði okkur sérlega vel þar sem uppbygging öflugs lærdómssamfélags er eitt af okkar aðal markmiðum. Innlegg hennar féll vel að þeirri vinnu sem er þegar komin af stað hjá okkur.

Eftir hádegi sóttu síðan allir nauðsynlegan og kærkominn fyrirlestur um Fíkniefni og forvarnir – Hvað getum við gert? frá Lögreglunni á Vestfjörðum en þar hófust góðar umræður um hvað við sem samfélag og við sem starfsmenn skóla getum gert til þess að berjast gegn þessari miklu vá sem stendur að börnunum okkar.

Auk þessa gesta voru formaður FG, félag grunnskólakennara, Þorgerður Laufey Diðriksdóttir og formaður SÍ, skólastjórafélag Íslands, til viðtals ásamt því að vera með innlegg á aðalfundum félaganna. Að lokum var Elín Þóra Stefánsdóttir eTwinning sendiherra á Vestfjörðum til viðtals en hún er kennari við Grunnskóla Bolungarvíkur.

Öflugt samstarf kennara og starfsmanna í skólum  á Vestfjarðarsvæðinu er virkilega gagnlegt og nauðsynlegt sem stuðningur við það góða starfs sem fer fram í skólum svæðisins. Haustþingin eru því góður vettvangur til þess að byggja upp öflugt lærdómssamfélag þar sem við lærum hvert af og með öðru.