Fundargerð í Grænfánanefnd 24. apríl 2019

Tálknafjarðarskóli

Fundur í Grænfánanefnd 24.apríl 2019

  • Hreyfimánuðurinn okkar er byrjaður og eru nemendur jafnt sem starfsfólk hvattir til að koma gangandi eða hjólandi í skólann.
  • Þann 6.maí verður haldinn hér í skólanum landshlutafundur en fundurinn er ætlaður þeim skólum á sunnanverðum Vestfjörðum sem eru með Grænfánann. Gaman væri ef allir kjarnar ynnu verkefni tengt umhverfinu sem hægt væri að setja upp á ganginum.
  • Búið er að panta fleiri Boomerang bags merki til að sauma á taupoka og vonandi verður hægt að sauma nokkra poka áður en skólanum lýkur og fara með í búðina.
  • Í vetur gerðum við smá tilraun með rafmagn. Lesið var af rafmagnsmælum og aftur eftir mánuð. Síðan í einn mánuð spöruðum við rafmagnið eins og við gátum og voru allir meðvitaðir að slökkva ljósin eins og hægt var. Þá var aftur lesið af mælunum og var greinilegur munur á rafmagnsnoktun seinni mánuðinn, hvað hún var minni.
  • Fljótlega þurfum við að fara að huga að vorverkunum, það þarf að stinga upp kartöflugarðinn og setja niður fræ í kassann. Búið er að kaupa potta, fræ og mold þannig að ef nemendur vilja setja niður sólblómafræ eins og undanfarin ár er það í boði.
  • Næsta sunnudag er Stóri plokkdagurinn. Þá eru allir hvattir til að fara út og plokka eða týna rusl. Lagt til að skólinn verði með í þessu verkefni og hvetji til íbúa hér til að koma saman og týna rusl. Hægt væri að fara í fjöruna í innanverðum Oddanum og fá leyfi hjá landeigendum. Ef margir koma þá er hægt að fara á fleiri staði. Einnig þarf að senda sveitastjóra póst og athuga hvort hægt sé að fá vinnubílinn lánaðan. Gaman væri líka ef boðið væri upp á einhverjar veitingar eftir plokkið. Búa þarf til auglýsingu um þetta og bera í hvert hús helst á föstudag.
  • Undanfarin ár hefur skólinn haft hreyfiviku þar sem allir eru hvattir til að taka þátt í ýmsum viðburðum. Við höfum til dæmis farið í fjallgöngu, hjólatúr, zumba, útijóga, útileiki og sjósund. Áhugi er að halda þessu áfram og voru nefndarmenn beðnir að koma með hugmyndir og breyta kannski eitthvað til. Það þarf að ræða þetta inn á kjörnum og fá sem flestar tillögur. Eins er gott að heyra hvað er skemmtlegast að gera.
  • Þar sem þema okkar næstu tvö árin er neysla og úrgangur væri gott að byrja á moltugerð. Skoða þarf hvað er best að gera, kaupa kassa eða smíða.
  • Ólöf spurði um stofuspæjarann hvort hann kæmi á næstunni. Það er ólíklegt.
  • Andrés minnti á að útbúa þarf nýja miða til að setja við slökkvarana.

Fleira ekki tekið fyrir og fundi slitið

Lára Eyjólfsdóttir

Fundargerð í grænfánanefnd 28. jan. 2019

Tálknafjarðarskóli

Fundur í Grænfánanefnd 28.janúar 2019

* Þann 18.janúar var rafmagnslaus dagur hér í skólanum. Allir máttu koma í náttfötum og með vasaljós. Byrjað var á því að bjóða leikskólabörnum að vera með í feluleik og var það mjög skemmtilegt.

* Í nóvember var lesið af rafmagnsmælum. Ætlunin var að gera það aftur í desember og reyna þá markvisst að draga úr rafmagnsnotkun. En það reyndist ekki vera rétti tíminn því margar seríur voru settar í gluggana og rafmagnsnotkunin jókst.

Þannig að við gerum þetta bara aftur núna í febrúar.

* Flokkunin gæti gengið betur, við getum staðið okkur betur í að flokka og vera dugleg að minna hvort annað á. Kannski væri betra að hafa endurvinnsludallana sýnilegri frammi á gangi og vel merkta.

* Byrjað er að taka frá og safna ávaxtaafgöngum til að gefa fuglunum og reyna þannig að minnka úrgang.

* Inn á klósettunum er einungis hægt að þurrka sér um hendurnar með pappír. Ætlum að skoða hvort hægt sé að hafa líka handklæði fyrir þá sem vilja frekar nota þau og minnka þannig pappírsnotkun. Og hafa sprittbrúsa til hliðar þannig að líka sé hægt að spritta hendurnar á eftir.

* Á leikskólanum eru notaðir einnota svampar til að börnin geti þurrkað sér um munn og hendur eftir matinn. Við getum saumað lítil þvottastykki sem hægt er að þvo og eru margnota og getum þá hætt að nota einnota klúta sem er betra fyrir umhverfið.

* Við höldum áfram að sauma taupoka til að setja í búðina. Panta þarf fleiri Boomerang bags merki til að sauma á pokana. Hægt er að hafa saumavélina á borði í valinu og geta þá þeir sem vilja saumað poka.

* Á Patreksfirði er verið að undirbúa opnun nytjamarkaðar sem er frábært framtak. Hægt er að fara þangað með ýmislegt sem fólk er hætt að nota í stað þess að henda. Við hvetjum alla til að nýta sér þetta og kíkja á markaðinn þegar hann opnar.

* 3.-5.bekkur sögðu frá umhverfisverkefni sem þau bjuggu til og settu upp á umhverfistöfluna okkar en þar má sjá hendur sem halda utan um jörðina. Þar stendur: Okkar litlu hendur geta gert stóra hluti.

* Og að lokum rædd sú hugmynd að hafa umhverfisdag með vorinu og gera eitthvað skemmtilegt saman tengt umhverfismálum.

Fundargerð í grænfánanefnd 28. nóv. 2018

Tálknafjarðarskóli

Fundur í Grænfánanefnd 28.nóvember 2018

* Í dag verður loksins afhending 7.Grænfánans og er það Bryndís sveitastjóri sem afhendir okkur fánann. Einnig mun Lilja Magnúsdóttir koma og vera með okkur en hún sinnir umhverfismálum fyrir Tálknafjarðarhrepp. Síðan verður boðið upp á ratleik sem 9. – 10.bekkur hafa undirbúið.

* Stofuspæjarinn kom í dag. Lagt til að hann kíki í stofurnar eftir skóladaginn til að athuga hvernig hefur verið gengið frá.

* Við ætlum að gera tilraun með að spara ramagn. Lesið var af rafmagnsmælum og svo verður það gert aftur eftir 3 vikur. Ætlunin er síðan að spara rafmagn eins og hægt er næstu 3 vikurnar og lesa aftur af en þar sem settar verða ljósaseríur í marga glugga er kannski betra að gera þetta aftur eftir áramót.

* Rafmagnslausi dagurinn verður um miðjan janúar og þá má mæta í náttfötum og með vasaljós.

* Tillaga um að kjósa ljósavörð, vatnsvörð, skógarvörð og flokkunarvörð. Ljósavörðurinn sér um að ljósin séu slökkt þar sem enginn er, vatnsvörðurinn sér um að vatnið renni ekki að óþörfu, skógarvörðurinn sér um að útisvæðið og umhverfið okkar úti sé snyrtilegt og flokkunarvörður fylgist með hvort rétt sé flokkað í endurvinnslufötur.

 

Fleira ekki tekið fyrir og fundi slitið.

 

Lára Eyjólfsdóttir

Fundargerð í grænfánanefnd 7. nóv. 2018

Tálknafjarðarskóli

Fundur í Grænfánanefnd 7. nóvember 2018

Annar fundur vetrarins var haldinn miðvikudaginn 7.nóvember kl: 11. Fundurinn var opinn öllum þeim sem vildu koma og fjölmenntu yngri nemendur.

* Erfitt hefur verið að finna dagsetningu fyrir Grænfánaafhendingu vegna anna en þetta verður vonandi fljótlega. Bryndís sveitastjóri ætlar að vera okkur innan handar og afhenda fánann.

* Rætt um ný markmið. Eitt af markmiðunum getur verið að minnka plastnotkun og hætta að nota einnota plastvörur. Smíða kassa sem henta undir moltugerð í vor. Við getum þó fljótlega byrjað moltugerð til að fikra okkur áfram og flokkað kaffipoka og eitthvað af lífrænum úrgangi.

* Lagt til að rafmagnslausi dagurinn verði í desember. Þarf að ræða á kennarafundi.

* 3.-5.bekkur tók þátt í norræna plastkapphlaupinu en þau fóru í fjöruna og týndu það plast sem þau fundu á 15 mínútum.

* Skólinn ætlar að taka þátt í Jól í skókassa líkt og undanfarin ár.

* Lagt til að farið verði meira í útikennslu, það þarf að ræða við umsjónarkennara og samnemendur.

 

Fleira ekki tekið fyrir og fundi slitið.

Lára Eyjólfsdóttir

Fundargerð í grænfánanefnd 26. sept. 2018

Tálknafjarðarskóli

Fundur í Grænfánanefnd 26.september 2018

Fyrsti fundur vetrarins var haldinn miðvikudaginn 26. Sept. kl: 11 og var ákveðið að hafa fastan fundartíma síðasta miðvikudag í mánuði.

* Búið er að velja í nýja Grænfánanefnd en það er gert á hverju hausti. Allir sem hafa áhuga geta verið í nefndinni og ef margir vilja vera með þá er þess gætt að nemendur skiptist á. Þeir sem eru í nefndinni þetta árið eru:

Jökull yngri kjarna, Agnes og Jón Þór miðkjarna, Berglind og Ólöf frá táningakjarna og Weronika og Elías frá unglingakjarna.

* Í október fáum við 7.Grænfánann afhentan. Rædd var sú hugmynd að fá nýja sveitastjórann sem er væntanlegur til að afhenda okkur fánann og verður það borið undir skólastjóra og starfsfólk. Gaman væri að gera eitthvað skemmtilegt í tilefni dagsins og fengu nemendur það verkefni að ræða þetta inn á sínum kjörnum hvað væri hægt að gera.

* Skólinn þarf að setja sér ný markmið fyrir næstu tvö árin og velja nýtt þema. Ræðum það frekar á næsta fundi. Eitt markmiðið getur verið að nýta náttúrulegan efnivið eins og nemendur hafa verið að gera í smiðju en þeir hafa veið að tálga úr greinum og höggva í stein.

* Jón Þór spurði um stofuspæjarann og hann verður væntanlegur fljótlega. Þá þarf að passa vel upp á að stofurnar séu snyrtilegar.

* Rætt um hlutverk þeirra sem sitja í Grænfánanefnd. Þau eru fulltrúar síns hóps og þurfa að kynna það sem rætt er um á fundinum t.d. á lýðræðisfundi á sínum kjarna.

* Jón Þór spurði hvort hægt væri að rækta meira grænmeti. Vegna tíðarfars í sumar var ekki góð uppskera en gaman væri að smíða grænmetiskassa í vor og auka ræktun enn frekar.

* Hreyfimánuðinum er að ljúka og þá getum við talið saman kílómetrana sem farnir voru. Nemendur erum samt hvattir til að koma áfram gangandi eða hjólandi í skólann.

 

 

Fleira ekki tekið fyrir og fundi slitið

 

Lára Eyjólfsdóttir

Fundur í grænfánanefnd 25. apríl 2018

 

  •  Nú e komið að úttekt vegna umsóknar 7. Grænfánans. Við eigum von á heimsókn frá
    Landvernd í lok maí og verkefnisstjóri hefur verið að vinna skýrslu sem skila þarf fyrir
    1.maí. Í haust fáum við svo vonandi afhentan nýjan fána og getum haldið þessu
    mikilvæga starfi áfram.
  • Gaman væri ef allir kjarnar gætu unnið verkefni tengt umhverfinu sem væri hægt að
    ræða og sýna.
  • Vorverkin okkar eru framundan, stinga þarf upp kartöflugarðinn og gaman væri að
    setja aftur niður sólblómafræ. Einnig er hreinsunardagurinn alltaf í lok maí þar sem
    allur skólinn fer um þorpið og týnir rusl.
  • Verkefnisstjóri ætlar að tala við Lilju sem er umsjónarmaður flokkunarsvæðisins og
    athuga hvort við getum komið í heimsókn að skoða og fengið fræðslu um flokkun.
  • Hreyfimánuðurinn er hafinn og gaman að sjá hve duglegir nemendur eru að koma
    hjólandi eða gangandi í skólann.
  • Rætt um hreyfivikuna. Viljum við hafa hreyfiviku áfram og hvað á að vera í boði ?
    Fulltrúar í nefndinni þurfa að ræða þetta inn á kjörnum hvort við eigum að halda
    áfram með það sem hefur verið í boði eða bæta einhverju við eins og t.d ganga í
    fjörunni, sandkastalakeppni eða ganga upp að Tunguvatni. Markmiðið er að fá alla til
    að hreyfa sig meira úti og voru nemendur ánægðir með það sem var í boði.
  • Andrés benti á að inn á nams.is er efni sem heitir Grænfánaveislan og gaman væri að
    skoða það.
    Fleira ekki tekið fyrir
    Lára Eyjólfsdóttir